我細漢捌佮一群囡仔出去耍，經過鹹水港大路的時陣，看到ㄧ个食酒的人倒佇稻草堆跤！我斟酌共看，唉喲！伊毋是別人，伊是阮阿爸呢！彼个時陣，我一直咧想，佇我的囡仔伴面頭前，為什麼阮阿爸是一个醉仙？為什麼阮阿爸佮別人的阿爸無仝款？毋是做老師的，毋是開賓士的頭家，嘛毋是穿西裝提公事包的工程師咧。我有夠歹勢。這馬，我大漢矣，嘛有年紀矣，才知影看代誌毋是遮爾簡單。
聽細漢阿姑講，自伊做囡仔有記持，厝裡已經作六甲穡，駛兩隻牛矣。彼當陣阿爸二十外歲。阿爸講，有一擺愛駛牛耙，毋過，伊透早煞睏傷晚。阿爸趕緊牽牛仔出門，半路搪著阿公。阿公誠受氣，大聲喝：「啥人路啊！ 牛仔牽轉去！」 聽著阿公遮爾歹聲嗽， 阿爸毋敢應話，共目屎擒咧，行大伐緊去園裡作工課。 佇外口，阿爸予人呵咾是「六甲伯仔」。 彼是伊自少年開始訓練出來的。駛田播秧仔愛趕節氣，阿爸跤手猛掠， 駛牛的手勢好，反應緊。伊講，家己的田駛好，伊嘛會去共叔公仔in鬥駛牛。
阿爸講伊公學校讀三年四個月，做兵的時陣是做傳令兵，送公文。公學校讀無煞，留佇厝裡作穡。阿爸講，伊十外歲仔捌去掘甘蔗，大大粒的蔗頭一下仔就挖起來矣。佇遐削甘蔗根的查某人就講：「猴囡仔，遮爾有擋頭，規粒（甘蔗的）葫蘆仔頭攏拚起來矣。」
阿爸自細漢膽頭真在。阿媽講，有一擺，阿爸綴伊去水利所，阿爸看著水利所彼隻狗仔誠古錐，一直佮彼隻狗仔耍，攏袂驚生份。阿媽佇邊仔，看著是驚甲皮皮掣！阿爸講：「驚驚袂著等。」就是講，做工課愛猛醒，毋通死酸慢趖。
戰後無偌久，阿爸十外歲，拄著寒熱病仔 (瘧疾)流行。可能小可仔傷著伊的頭殼，致使伊講話無通像阮遮爾好勢，有當時仔伊欲表達的意思袂當予人了解。毋過，伊的心肝是比豆腐閣較柔軟。
留佇厝內，伊自少年就綴佇阿公的身軀邊作穡。伊先娶阿母入門鬥做工課，才去做兵。伊對待厝內的兄弟姐妹無計較，伊照起工作穡，陪伴序大人，予兄弟姐妹佇外口會當安心拍拚事業，毋免掛心。阿爸四十七歲，不幸家後過身。這个苦情一時無法度排解，只好借酒解憂愁，借酒敨放心內的鬱卒。有時陣，伊煞感覺伊的付出，換來的敢真正像伊講的「我是細姨仔生的。」
阿爸在生所受的壓力，因為啉酒，煞不時咧受傷。造成伊六、七十歲了後有血糖佮血壓的問題。七十五歲了後慢慢有腦部退化，老人失智的症頭。八十歲，中風情形那來那嚴重，嘛袂認得人矣。
阿爸，這馬，你已經做仙矣，你愛萬念放下，一心念佛。去一个無分別，無病苦，無煩惱的西方淨土。阿彌陀佛。
