中山北路之秋

楓仔紅紅紅   張壽仁
中山北路行八擺
楓仔芳芳芳

中山北路之夏

中山北路之夏   張壽仁

齷齪的中晝
楓仔樟仔咧盹龜
車聲hù-hù-kiò

媠䆀 黃恬昕 台北市保安宮配祀註生娘娘， 有一副對聯： 註果註因美惡憑天賦與 生男生女早遲由我推排 上聯「美惡」，應當是閩南語「媠䆀」。以前，無閩南語專用詞，嘛無講華語，攏使用漢字。 若共「美惡」改做「媠䆀」，字義較準，平仄有合，朗讀嘛加較順。

作穡人 黃恬昕 有一改，我陪阿爸去林口長庚回診。佇門診外口有真濟人咧聽候，逐家就那張等那開講破豆。 坐佇阮邊仔的，是一對頭毛白蔥蔥的老翁某。原來，這對翁某過去佇雲林咧飼蚶仔。這个阿伯才欲開始講爾爾，就講：「作穡人，透早做到透暗，會做做到袂做，話若欲講透支，目屎就掰袂離。」 聽阿伯仔講不止仔濟伊學駛牛的故事，我才知影，原來駛牛的工課無輕可，毋是若咧食『麥當勞』遐爾簡單。伊講：「牛仔脾氣若來，據在你按怎共伊捽按怎共伊揲，伊毋行就是毋行，攏無伊的法。」阮阿爸佇邊仔，笑笑仔講：「駛牛的人，反應愛比牛仔較緊，才駛會行。」 阿爸自十外歲仔就開始學駛牛矣。聽著飼蚶仔的阿伯按呢講，阮才了解，阿爸佇外口予人呵咾「六甲伯仔」，原來毋是凊彩講講的。阮兜作六甲穡，拄著落種，阿爸的雙跤愛一直綴著牛隻耍田的速度，一區閣一區駛無停。 水田駛好，紲落播秧仔，掖肥，挲草，薅草，毒農藥，無一時清閒。做陸軍兵工班長的二兄，有一擺放假轉來厝，拄著園裡咧駛田。阿兄講，干焦駛鐵牛仔紡田，二十歲的少年兄就強欲擋袂牢矣，何況鐵牛紡完，愛閣踏牛耙。阿爸講：「作穡人攏愛看天公伯仔的面色，拄著好年冬才有好收成。」 有一擺，我佇福營圖書館門口，聽著兩个阿桑咧開講，講In厝裡做兩甲田，閣講，做穡是偌爾仔硬篤喔。我聽一下，心肝內想講：「作穡人，規年迵天攏無歇睏，毋過，六甲伯仔的苦情敢有人知影？」

講鬥句，學閩南語 黃恬昕 過年新正，新學級拄開始。閩南語課，我予學生囡仔看閩南語唸歌，≪唸啥物歌≫。這是舊年拄過身的人間國寶--楊秀卿藝師，佮伊的藝生儲建智翁某講的故事，〈李哪吒大鬧東海龍王〉。這个影片是in佮「虎尾科技大學」合作，佇外國得著德國的「紅點設計大獎」，名利雙收。 除了低年級有的囡仔先備智識較欠缺，有的煞講誠無聊以外；中，高年級學生攏看甲蓋歡喜！因為唸歌自頭到尾攏有鬥句，影片有圖有字閣心適，囡仔反應誠好。 看煞，我用一寡仔時間來共囡仔解說。台灣唸歌，用閩南語，用七字仔，用月琴佮大廣絃仔伴奏，那唸那唱，伊對古早時代的明朝，四，五百年前就有矣。論真來講，唸歌藝術來到台灣社會，經過遮濟時間，已經成做台灣這塊土地特殊的藝術矣。 講鬥句正港是過去台灣人講話的慣習。首先，我對阮阿媽講起。阿媽毋捌字。有一擺，我嫌講：「阿媽，厝裡的樹欉佮花栽哪會攏無開花？」阿媽聽著，隨應講：「戇孫仔，花無百日紅，人無千日好。」 以早，拄著年仔節仔，攏愛家己刣雞刣鴨。我看著阮阿母共雞仔掠咧，那掣雞頷頸毛閣那唸，講：「做雞做鳥無了時，緊緊去出世，出世好額人囝兒。」 若是媒人婆講鬥句就愈厲害矣。親情做成，就愛講：「新郎新娘雙雙閣對對，囝囝孫孫萬年大富貴。」新郎來敬酒，愛講：「燒酒啉予焦焦焦，祝你明年做阿爸。」新娘敬茶，著愛講：「食茶食甲甜甜甜，予你明年生後生。」 講鬥句學閩南語，較緊，閣較心適。

駛牛車 黃恬昕 我讀國中的時，有一工，阿爸鐵牛仔紡了，欲共鐵牛駛轉去，伊叫我共園裡的牛車駛轉去厝。 我雄雄聽一下，煞毋知是欲吼抑是欲笑，想講敢是家己幻聽，聽了重耽去。我斡頭閣四箍輾轉看看咧，彼个時空，除了我佮阿爸，無第三人呢！ 「無剉，規欉好好。」都是我愛共牛車駛轉厝。 這聲代誌大條囉！駛牛車的農路遐爾狹，兩爿面的水道，一爿是深深深閣闊闊闊的大圳溝，一爿嘛是著水區當咧灌溉的水圳仔。這久，雙爿水道攏滇滇滇閣足掣流的。 駛過這條農路，牛車就愛tshuánn過鹽水港大路，大路頂的汽車車來車去，彼才是大考驗。阮兜的牛仔脾氣䆀閣厚性地，這擺，伊若毋聽我的，我是欲按怎。 這馬，我已經袂記得家己按怎坐起去牛車頂，閣好禮仔喝牛仔起行。駛過農路，人落來聽候兩爿面來車，等無車才過大路。駛過來車路這爿，你若淺想講，已經安心矣，你就錯囉。 牛車駛佇大路頂直行兩三百公尺，就愛正斡，聽起來這毋是佮桌頂拈柑仝款。錯！你愛細膩仔khau大輾，才袂挵著交通號誌柱仔，猶毋過「千金難買早若知」。這的時陣，彼个號誌已經予牛車撞一下糜糜卯卯矣。 牛車駛轉來厝了後，我就假講欲緊去寫字。過無偌久，阿爸轉來，就問講，是啥人共彼支交通號誌挵挵倒？我恬恬無敢講。

「共牛仔喝尿」是啥物意思？ 黃恬昕 按照華語的意思，是講「和美國『牛仔』一起喝尿」。 毋過，這無合常理。 作穡人，牛隻是蓋重要的資產。若像講好額人厝裡有開BMW抑是BENZ仝款的意思。作穡人共牛仔當做是厝裡的一份子，愛共牛仔的生活自頭到尾照顧甲足好勢。 暗時仔，牛仔攏愛牽入去伸手間仔的牛牢內底顧予好。欲牽入去牛牢內進前，愛先牽出去牛牢外口喝尿（噓尿）。有時陣，牛仔喝毋放尿，牛仔放尿佇牛牢內，規个牛牢內就淹大水喔！ 牛牢內淹水，愛緊去灶跤抔火烌燥水。庄跤人顧牛隻是若咧顧媠某仝款，牛牢內攏愛摒甲清清氣氣。 逐暗，愛牽牛仔出去牛牢外口喝尿，是作穡人逐工的工課。 所以，「逐暗，共牛仔牽出去牛牢外口噓尿」，才是「共牛仔喝尿」正解。 但是，話閣講轉來，咱若無受漢文字制約，直接用聲音來講，就是，「kā gû-á huah jiō」抑是「kā gû-á hoah jiō」就完全無這个問題矣。