偷挽菝仔 黃恬昕 阮細漢逐不時都真枵饞，有時陣，三頓食飽猶是愛揣物件窒喙空。 論真來講，阮嘛毋是規工食飽閒仙仙去共人tsuî 菝仔。其實，彼是阮兩三工就愛出去割牛草，就會順紲挽菝仔罔啖糝。 牛草一下割煞，若拄著菝仔熟矣，抑是主人家當咧睏中晝，看看咧四邊攏無人，阮就順手牽羊，共菝仔挽來食。 這欉菝仔拄好生佇鴨寮仔的水池仔邊，普通普通大欉。平常時仔無人照顧，毋過，菝仔粒嘛生甲不止仔厚。你共正爿倒爿頂懸下跤四界相相巡巡咧，總有幾粒仔較熟的會當挽起來窒喙空。 囡仔人重食，若無菝仔欲按怎？阮就會想空想縫揣物件來食。西北雨一停，草埔內底就有足濟露螺通抾去賣，買物食。有當時仔，路裡嘛有人擲討捔的銅管仔通抾，上無嘛會當換兩粒糖仔罔含。 細漢佇庄跤，攏有古物商會捒一台車仔，一四界巡邏咧收歹銅舊錫。阮共厝裡歹去的農具抑是抾來的歹鐵仔提予伊，伊就會捲一卷大大卷的麥芽膏換你。 細漢囡仔當咧大閣gâu食。毋過，序大人規工咧無閒做工課，嘛無閒管遐濟。這馬想起來，偷挽菝仔，煞成做庄跤囡仔心適的記持。