一條面巾 黃恬昕 阿媽捌佮我講著「一條面巾」的故事。 原來，台灣社會佇一百年前，就遐爾注重衛生慣習。日本政府規定愛大摒掃。 阿媽講：「有一擺大摒掃，規厝間的物件攏愛搬搬出來外口，逐家摒甲大粒汗細粒汗。拄才摒好，物件已經囤甲一四界。 逐家攏足緊張，阿本大人嘛連鞭就欲到矣！眾人你一句我一句， 自頭到尾閣點一遍，看佗位的啥物物件有落勾去無？ 雄雄，阿媽想到講，「啊！有一條面巾猶未提出來啦！」今這聲害矣，悽慘矣！阿媽三步做兩步，趕緊去共彼條面巾提出來。 阿媽講到遮，伊講：「想著彼條面巾，到今猶感覺心肝頭噗噗惝！」伊閣講：「阿本大人有夠歹，有夠惡！磕袂得就會予摃甲哀爸叫母。」 阿媽講，伊彼擺是「好米請著好人客」，搪著好人。彼擺，阿媽有影著巡查，有可能大人有看著阿媽走入去房間內底，好佳哉無揣伊麻煩。 這馬，學生囡仔佇學校嘛攏有大摒掃，上起碼一學期嘛大摒一、兩遍。台灣人的衛生習慣就親像這擺的疫情仝款，正港是通人呵咾。